Amado:BE doti marrë përgjegjësitë......

Amado: BE do t'i marrë përgjegjësitë që i takojnë rreth çështjes së Kosovës
Ministri i Jashtëm i Portugalisë Luiz Amado tha sot në Prishtinë se Bashkimi Evropian së shpejti do të marrë përgjegjësitë që i takojnë rreth çështjes së Kosovës.

Kosova vlerësohet çështje e rëndësishme për Bashkimin Evropian dhe Unioni tregohet i gatshëm të merret me të, edhe gjatë procesit të negociatave shtesë ndërmjet treshes së Grupit të Kontaktit dhe Prishtinës e Beogradit. Këtë porosi ka sjellur sot në Prishtinë ministri i Jashtëm i Portugalisë, Luiz Amado si vend që ka kryesimin e radhës së Bashkimit Evropian." Ne duam të marrim përgjegjësitë që na takojnë në këtë proces. Kosova është në Evropë dhe Bashkimi Evropian ka përgjegjësi të mëdha në zgjidhjen e kësaj çështjeje”, tha Amado, duke mos dhënë përgjigjje konkrete nëse koha e bisedimeve shtesë është e mjaftueshme për t’u bindur Bashkimi Evropian, që të njoh pavarësinë e Kosovës. Amado fokusoi rëndësinë e pranisë së Unionit në ndërmjetësimin e negociatave, përmes përfaqësuesit Ishinger. "Ne jemi në një fazë të re të këtij procesi. Bashkimi Evropian ka marrë përgejgjësi të reja dhe treshja, Union, Shtete të Bashkuara dhe Rusi po merrem sërish me këtë çështje me mbështetjen e Sekretarit të Përgjithshëm të OKB-së” tha Amado.
Ai theksoi se çështja e Kosovës do të jetë ndër temat kryesore të takimit të ardhshëm të Këshillit të Ministrave të BE-së, i paraparë për dhjetëditëshin e parë të shtatorit.
Bashkimi Evropian vlerësohet ndër faktorët kryesor në procesin e definimit të statusit të Kosovës. Liderët në Prishtinë vazhdimisht kanë kërkuar ruajtjen e unitetit të BE-së, sidomos në situatën e kundërshtimit të vazhdueshëm nga Rusia për pavarësinë. Ndërkaq Grupi Ndërkombëtar i Krizave dje ka paralajmëruar Bashkimin Evropian për mundësinë e një konflikti të përgjakshëm dhe destabilizues në qoftë se vendet anëtare nuk e pranojnë përgjegjësinë primare që ta sjellin Kosovën drejt pavarësisë së mbikëqyrur deri në prill, ose maj të vitit 2008.